Joriy yilning 25-28-sentabr kunlari “O‘zaeronavigatsiya” Markazi DUK mutaxassislari Ozarbayjon poytaxti Boku shahrida amaliy tashrif bilan bo‘lishadi. Tashrifdan asosiy maqsad — “Azeraeronavigatsiya” (AZANS)dagi hamkasblar bilan havodagi harakatni rejalashtirish va oqimlarni tashkil etish sohasida tajriba almashishdir.

Tashrif davomida havodagi harakatni tashkil etish sohasidagi zamonaviy yondashuvlar, texnologiyalar va yechimlar muhokama qilinadigan uchrashuvlar va ishchi sessiyalar rejalashtirilgan. Har ikki korxona vakillari havo hududidan foydalanish samaradorligini oshirish va mintaqada parvozlar xavfsizligini ta’minlash chora-tadbirlarini kuchaytirishga xizmat qiluvchi ilg‘or tajriba almashadilar.

“O‘zaeronavigatsiya” Markazi DUK va AZANS o‘rtasidagi hamkorlik ko‘rsatilayotgan xizmatlar sifatini oshirish va havodagi harakatni boshqarish sohasida innovatsiyalarni rivojlantirishga qaratilgan. Tajriba almashish aviatsiya sanoati faoliyatini optimallashtirish va parvozlar xavfsizligini yuqori darajada saqlashga yordam beradigan ilg‘or yechimlarni joriy etishda muhim qadam bo‘ladi.